پاکستان سپر لیگ کے تیسرے ایڈیشن کے کامیاب انعقاد کے بعد پاکستان کبڈی فیڈریشن نے بھی سپر کبڈی لیگ کی تیاریاں تیز کر دی ہیں۔ پاکستان کبڈی فیڈریشن کے سیکرٹری رانا محمد سرور کا کہنا تھا کہ اپریل کے تیسرے ہفتے میں سپر کبڈی لیگ کا انعقاد کیا جائے گا۔ ان کا کہنا تھا کہ پی ایس ایل کے کامیاب انعقاد سے غیر ملکی کھلاڑیوں کا اعتماد بحال ہوا ہے۔ سپر کبڈی لیگ میں بھی 8 ممالک کے 20 کے قریب کھلاڑی شریک ہونگے۔ رانا سرور کا کہنا تھا کہ سپر کبڈی لیگ رواں سال ہونے والی ایشین گیمز کی تیاری میں مددگار ثابت ہوگی۔ پاکستان کبڈی فیڈریشن کوشش کر رہی ہے پانچ ملکی ٹورنامنٹ کا بھی انعقاد کیا جائے اس سلسلہ میں مختلف ممالک جس میں کوریا، ایران، سری لنکا اور بھارت سمیت دیگر ممالک کو ٹورنامنٹ میں شرکت کی دعوت دی گئی ہے۔
